აშშ-ის პრეზიდენტმა ჯო ბაიდენმა აშშ-ის მოქალაქესთან ქორწინებაში მყოფი ასობით ათასი მეუღლის ამნისტია გამოაცხადა. როგორც დასავლური მედია წერს, ისინი ქვეყანაში არალეგალურად იმყოფებიან და ოფიციალურად ექვემდებარებიან დეპორტაციას.

არალეგალური მიგრაცია ამერიკის შეერთებულ შტატებში საარჩევნო კამპანიის ერთ-ერთი ყველაზე მნიშვნელოვანი საკითხი გახდა, რაც, როგორც ბიბისი წერს, მნიშვნელოვნად ართულებს პრეზიდენტის ცხოვრებას.

მაისის ბოლოს ჯო ბაიდენმა გამოსცა განკარგულება, რომლის მიზანი იყო აშშ-მექსიკის საზღვარზე მიგრანტების ნაკადის შეზღუდვა. ისინი, ვინც ამერიკის საზღვარი უკანონოდ გადაკვეთეს, შეერთებულ შტატებში თავშესაფრის მიღებას ვერ შეძლებენ. ეს ღონისძიება ამოქმედებას იწყებს მაშინ, როდესაც საზღვარი გადატვირთულია. ამ სიტუაციაში, საიმიგრაციო სამსახურის წარმომადგენლებს მიეცათ უფლება, ქვეყნიდან გააძევონ ადამიანები და არ მიიღონ მათგან თავშესაფრის მიღების თხოვნა.

თეთრმა სახლმა გადაწყვიტა, შეამსუბუქოს აშშ-ის მოქალაქესთან ქორწინებაში მყოფი იმ ადამიანების ბედი, რომლებიც ქვეყანაში მინიმუმ ათი წელია იმყოფებიან. მათ დროებითი მუშაობის ნებართვა მიეცემათ. ადმინისტრაციის გათვლებით, ახალ წესებით ნახევარ მილიონზე მეტი ადამიანი ისარგებლებს.