რუსეთმა უკრაინა დაადანაშაულა საჰაერო-კოსმოსური ძალების სტრატეგიული ბომბდამშენის (Ту-22М3) გატაცების მცდელობაში. კიევს ამ განცხადებაზე რეაქცია ჯერჯერობით არ ჰქონია.
რუსეთის უშიშროების ფედერალურმა სამსახურმა დღეს, 8 ივლისს გამოაქვეყნა განცხადება, რომ „აღკვეთილია უკრაინის სპეცსამსახურების მორიგი მცდელობა, ჩაეტარებინათ ოპერაცია საზღვარგარეთ Ту-22М3-ის გასატაცებლად“. რუსული უშიშროება ირწმუნება, რომ ოპერაციის მომზადებასა და რეალიზაციასთან კავშირი აქვთ ნატოს წევრი ქვეყნების სპეცსამსახურებს. კონკრეტული სახელმწიფოები დასახელებული არ არის.
რუსეთის უშიშროების ფედერალური სამსახურის მტკიცებით, უკრაინის დაზვერვა აპირებდა ფულადი ჯილდოს და იტალიის მოქალაქეობის მიღების სანაცვლოდ გადაებირებინა რუსი მფრინავი, რომელიც სტრატეგიულ ბომბდაშენს უკრაინის ტერიტორიაზე დასვამდა. კრემლის მიერ კონტროლირებული სააგენტოები უშიშროების სამსახურზე დაყრდნობით წერენ, რომ პილოტს სამ მილიონ დოლარს სთავაზობდნენ.
Ту-22М3, რომელსაც ბირთვული ბომბების და რაკეტების გადატანაც შეუძლია, საზღვაო და სახმელეთო სამიზნეებზე დარტყმებისთვისაა განკუთვნილი.
