ოპოზიციური პარტიები „ნაციონალური მოძრაობა“, „გირჩი - მეტი თავისუფლება“, „ახალი“, „ლელო“, „დროა“ და „სტრატეგია აღმაშენებელი“ საქართველოს პრეზიდენტის „ქართული ქარტიის“ ხელმოწერის შემდეგ ქმნიან „ერთიანობის დეკლარაციას“, რომელიც შეეხება ქვეყნის ევროატლანტიკურ სტრუქტურებში გაწევრიანებასა და არჩევნებამდე და არჩევნების შემდეგ საერთო მიზნებისთვის ერთიანობას.
„იმისათვის, რომ გავიმარჯვოთ მოახლოებულ არჩევნებში, ხელს ვაწერთ ერთიანობის დეკლარაციას, რომელიც გულისხმობს ერთიანობას, როგორც საპარლამენტო არჩევნებამდე, ასევე არჩევნების შემდეგ“, - წერია დეკლარაციაში.
დოკუმენტზე ხელმომწერი პარტიები თანხმდებიან:
ეცდებიან, რომ ოპოზიციური პარტიებისთვის მიცემული ხმები არ დაიკარგოს ხუთპროცენტიანი ბარიერის გამო;
8 ივლისამდე, შეთანხმდებიან არჩევნებში მონაწილეობის კონფიგურაციებზე;
2024 წლის საპარლამენტო არჩევნების შემდეგ არ დაუჭერენ მხარს იმ მთავრობის დამტკიცებას, რომელშიც „ქართული ოცნება“ მიიღებს მონაწილეობას;
მხარს დაუჭერენ ერთიან საპრეზიდენტო კანდიდატს;
გაერთიანებული ძალებით, ეცდებიან, საზღვარგარეთ მცხოვრები მოქალაქეების არჩევნებში ჩართვას;
ერთიანი ძალებით ეცდებიან, ხელი შეუშალონ არჩევნების გაყალბებას.
დოკუმენტზე ხელმომწერი პარტიები „ერთიანობის დეკლარაციაზე“ მიერთებას სხვა ოპოზიციურ პარტიებსაც სთავაზობენ.
საპარლამენტო არჩევნები საქართველოში 2024 წლის 26 ოქტომბერს გაიმართება 5%-იანი ბარიერით. მაღალი ბარიერის გამო, შესაძლოა, ოპოზიციური პარტიების დიდმა ნაწილმა ვერ მოიპოვოს მანდატები პარლამენტში.
